جلالاباد (پژواک، ۱۹ کب ۱۴۰۲): د ننګرهار د کليو بیارغونې او پراختيا رياست مسوولين وايي، تورخم کې د راستنېدونکو کډوالو پنډغالي کې د څښاک اوبو رسولو دوه شبکې جوړوي.
د ننګرهار ولایت د کليو بيارغونې او پراختيا رييس مولوي قسمتالله مبارز وايي، د مومندرې ولسوالۍ اړوند تورخم ښارګوټي ته څېرمه «عمري کمپ» کې يې له پاکستانه راستنېدونکو کورنیو ته د اوبو رسولو دوو شبکو د جوړېدو چارې پيل کړې دي.
هغه زياته کړه، پر یاده پروژه ۸ میلیونه او ۲۰۰ زره افغانۍ لګښت راځي چې د ملګرو ملتونو د ماشومانو ملاتړ صندوق (يونيسف) له لوري ورکول کېږي.
د نوموړي د معلوماتو له مخې، دواړو شبکو ته دوې ۵۰ زره لېتره ذخیرې جوړېږي چې د لمریزې برېښنا د ۳۴ تختو او ۱۱ کیلومتره پایپلاین پر مټ به ۷۵۰ کورنیو ته پاکې اوبه رسوي.
مسوولين وايي، هڅه کوي چې د تورخم په عمري کمپ کې راستنېدونکو کډوالو ته هر ډول اسانتياوې برابرې کړي.
Views: 20
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن