بدخشان کې د لاسي بم چاودنې له امله یو کس وژل شوی او یو بل ټپی دی

فیض‌اباد (پژواک، ۲۸ حمل ۱۴۰۳): بدخشان کې ځايي مسوولین وايي چې د دغه ولایت په بهارک ولسوالۍ کې د لاسي بم چاودنې له امله یو تنکی ځوان وژل شوی او یو سپین‌ږیری ټپي شوی دی.

د بدخشان د امنیې قوماندانۍ ویاند احسان‌الله کامګار پژواک خبري اژانس ته وویل، دغه پېښه نن سهار شاوخوا ۱۰:۳۰ بجې هغه مهال د بهارک ولسوالۍ اړوند په ملنګ‌اب کلي کې شوې چې یوه تنکي ځوان له زاړه لاسي بم سره لوبې کولې.

هغه زیاته کړه، د دې پېښې ټپي چې د وژل شوي کس نیکه دی، د یادې ولسوالي کلینیک ته لېږدول شوی او تر درملنې لاندې دی.