پلخمري (پژواک، ۳ غویی ۱۴۰۳): د بغلان د عامې روغتیا ریاست وايي، تېر کال په دغه ولایت کې نږدې ۱۸۰۰ کسان د نريرنځ پر ناروغۍ اخته شوي او د اووه ښځو په ګډون ۱۱ کسان يې له امله مړه شوي دي.
د بغلان د عامې روغتیا ریاست د نريرنځ ناروغۍ د مخنیوي څانګې مسوول، ډاکټرغلام محيالدین همایوني له پژواک خبري اژانس سره په ځانګړې مرکه کې وویل، دغه ولایت کې تېر کال ۱۷۸۴ کسان د نريرنځ «ټوبرکلوز» یا سل پر ناروغۍ اخته شوي چې له نیمايي ډېرې یې ښځې دي.
دی وايي، نریرنځ یوه ساري او وژونکې ناروغي ده چې د نارینهوو په پرتله ښځې ډېرې پرې اخته کېږي.
هغه زیاتوي، تېر لمریز کال د یادې ناروغۍ له امله دغه ولایت کې د اوو ښځو په ګډون ۱۱ د پاخه عمر لرونکي کسان مړه شوي او په خبره یې چې د پاتې ناروغانو درمنله هم ۹۷ سلنه بشپړه شوې ده.
د روغتیا نړۍوال سازمان د شمېرو له مخې په افغانستان کې هر کال شاوخوا ۷۶ زره کسان د نريرنځ پر ناروغي اخته کېږي چې یوازې ۵۳ زره یې تر درملنې لاندې نیول کېږي.
GET IN TOUCH
NEWSLETTER
SUGGEST A STORY
PAJHWOK MOBILE APP