پروان کې د ترافیکي پېښې له امله پنځه کسان ټپیان شوي

کابل (پژواک، ۷ غویی ۱۴۰۳): د پروان امنیه قومانداني وايي، د دغه ولایت په شینواري ولسوالۍ کې د یوې ترافیکي پېښې له امله د یوې ښځې په ګډون پنځه کسان ټپيان شوي دي.

د پروان د امنیه قوماندانۍ ویاند فضل‌الرحیم مسکین‌یار وايي، یاده پېښه نن سهار (جمعه د غويي۷مه) د دغه ولایت د شینواري ولسوالۍ په درازګرد سیمه کې شوې ده.

هغه زیاتوي، یاده ترافیکي پېښه هغه مهال رامنځته شوې، یو کرولا موټر چې درې کسان پکې سپاره وو د چاریکار ښار په لور روان و چې پر لار یې له یوه سراچه موټر سره ټکر وکړ.

هغه څرګنده کړه جې دغه پېښه کې کرولا موټر کې سپاره دوه نارینه او یوه ښځه او  سراچه موټر کې سپاره دوه نارینه ټپیان شوي دي.

د هغه په خبره، د پېښې ټپيان د درملنې لپاره د پروان ملکي روغتون ته لېږدول شوي او قضیه د پروان د ترافیکو مدیریت تر څېړنې لاندې ده.