کابل (پژواک، ۲۹ غویی ۱۴۰۳): سېمهییزې سرچينې وایي، پکتیا کې پر ډېورڼد فرضي کرښه تر نښتې وروسته د دواړو غاړو د قومي مشرانو یوې ګډې جرګې د اوربند، خرلاڅيو لارې د پرانیستل کېدو او یوې کمېټې جوړېدو پرېکړې کړې.
د راپورونو له مخې، له تېرو څلور ورځو راهیسې د پکتیا په اريوب ځاځي او ډنډپټان ولسوالیو کې له ډيورنډ فرضي کرښې سره نږدې د افغان او پاکستاني ځواکونو ترمنځ وقفهيي نښتې روانې وې او تېره ورځ یوې حکومتي سرچینې پژواک ته ویلي و چې د وړمه شپه د پاکستاني لوري ډزو کې درې ملکي وګړو خپل ژوند له لاسه ورکړی او لس نور ټپیان شوي دي.
د يادې جرګې غړي او د ځاځي اريوب ولسوالۍ قومي مشر حاجي ولي ځاځي پژواک خبري اژانس ته وويل چې نن د ډنډپټان ولسوالۍ د خرلاڅيو دروازه کې د کرښې دواړو غاړو قومي مشرانو ترمنځ ګډه جرګه وشوه چې د دواړو غاړو مسوولينو په کې ګډون درلود.
هغه وویل، په دغه جرګه کې د اروبند پرېکړه شوې ده.
نوموړي دغهراز وویل، په دغه جرګه کې پرېکړه شوې چې د خرلاڅيو لار به هم ژر تر ژره بېرته پرانیستل کېږي او سوداګري به له سياست سره نه ګډېږي.
د يادې ګډې قومي جرګې يو بل غړی محمدانور صديقي هم وایي په دغه جرګه کې چې نن غرمه مهال وشوه، لومړی د اوربند پرېکړه وشوه؛ ځکه په جګړه کې هر وخت زيان د کرښې د دواړو غاړو ملکي خلکو ته اوړي.
هغه زياته کړه، په جرګه کې دویمه پريکړه دا وشوه چې د خرلاڅيو دروازه به ژر تر ژره بېرته خلاصېږي او راتلونکي کې به د ستونزو رامنځته کېدو پرمهال ياده لار نه تړل کيږي.
هغه وویل، دغهراز په یاده جرګه کې پرېکړه وشوه چې د کرښې د دواړو غاړو له قومي مشرانو څخه به ۴۰ کسيزه کميټه جوړېږي او پر کرښه د هر ډول ستونزو رامنځته کېدو پرمهال به لاس په کار کېږي.
هغه وويل، د يادې کميټې جوړېدو او رسمي کېدو لپاره د دواړو لورو مسوولينو وويل چې د کميټې جوړولو خبره به له خپلو لوړپوړو مسوولينو سره شريکوي او راتلونکې شنبه به د دواړو لوري کسان د یادې کمیټې جوړېدو په موخه سره کینې.
د یادونې ده، د یادې جګړې له پیل راهېسې د پکتیا ولایت د خرلاڅيو لار هم تړل شوې ده.
د پکتیا ولایت سېمهییزو مسوولینو تراوسه په دې اړه څه نه دي ویلي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن