افغاني سرې میاشتې له قطر سره د سوري زړه ماشومانو درملنې برخه کې هوکړه‌لیک لاسلیک کړ

کابل (پژواک، ۳۰ غویی ۱۴۰۳): افغاني سرې میاشتې ټولنې د سوري زړه ۱۶۹ ماشومانو درملنې په موخه له قطر سره یو هوکړه‌لیک لاسلیک کړی دی.

د سرې میاشتې ټولنې پر خپله اېکس‌پاڼه لیکلي چې دغه هوکړه‌لیک د دې ټولنې د رییس مولوي مطیع‌الحق خالص او د قطر سرې میاشتې د مرستو برخې مدیر محمدصالح ابراهیم ترمنځ لاسلیک شو.

سرچینې زیاته کړه چې د دغه هوکړه‌لیک په ترڅ کې خالص له قطر د اوږدمهاله مرستو له امله مننه وکړه.

نوموړي له ټولو مرستندویه بنسټونو د سوري زړه ماشومانو درملنې غوښتنه وکړه.

د هغه په خبره، افغاني سرې میاشتې ټولنې په تېرو دوو کلونو کې پر دې ناروغۍ اخته شاوخوا ۳۰۹۴ ماشومان د درملنې په موخه د هېواد دننه روغتونونو ته معرفي کړي دي.

دغه بنسټ زیاته کړې چې تر اوسه پر دې ناروغۍ اخته زرګونه ماشومان د درملنې لپاره منتظر دي.

سرې میاشتې له دې مخکې هم په کابل ښار کې څلورو روغتونونو ته د سوري زړه ۴۰ ماشومانو معرفي کو لو خبر ورکړی و.