کابل (پژواک، ۱۲ غبرګولی ۱۴۰۳): د کرکټ ملي لوبډلې شل اووریزه نړیوال جام ته د چمتووالي په لړ کې په خپله دویمه تمریني لوبه کې سکاټلنډ ته د ۵۵ منډو په توپیر ماتې ورکړه.
د نننې لوبې پچه افغان لوبډلمشر راشد خان وګټله او لومړۍ د توپوهنې پرېکړه وکړه.
افغانستان په ټاکلو شل اوورونو کې د ۸ لوبغاړو په سوځېدو سره ۱۷۸ منډې جوړې کړې او سکاټلنډ ته یې د ۱۷۹ منډو هدف وټاکه.
په توپوهنه کې ګلبدین نایب ۶۹، عظمت الله عمرزي ۴۸، محمد نبی ۱۶ او راشد خان ۱۵ منډې وکړې.
په مقابل کې سکاتلینډ لوبډلې ورکړل شوې هدف پوره نه کړ او په شل اورونو کې د ۹ لوبغاړو په سوځېدو سره یې یوازې ۱۲۳ منډې وکړې او د ۵۵ منډو په توپیر یې افغانستان ته ماتې وخوړه.
د افغانستان له لوري په توپ اچونه کې مجیب الرحمن او کریم جنت دوه - دوه، نوین الحق، راشد خان، ګلبدین، ننګیالي خروټي او عظمت الله عمرزي بیا د سکاټلینډ لوبډلې یو - یو لوبغاړي وسوځول.
د یادونې ده، شل اووریزه نړیوال جام ته د چمتووالي په لړ کې د افغانستان لومړۍ تمریني لوبه له عمان سره د ورښت له امله بې پایلې شوې وه.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن