لښکرګاه (پژواک، ۱۶ غبرګولی ۱۴۰۳): د هلمند ځایي مسوولین وایي، د دغه ولایت خانشین او دېشو ولسوالیو کې ۵۸۰۰ کورنیو ته د پاکو اوبو رسولو شبکې رغول شوې او د اوبو تصفیې ماشینونه جوړ او فعال شوي دي.
د هلمند د والي ویاند مولوي محمدقاسم ریاض پژواک خبري اژانس ته وویل، د دغه ولایت خانشین او دېشو ولسواليو اوسېدونکي چې له دې مخکې یې د څښاک پاکو اوبو ته لاسرسی نه درلود، د درې میلیون افغانیو په لښګت ورته د پاکو اوبو رسولو شبکې رغول شوې او د اوبو د تصفیه کولو ماشینونه جوړ او فعال شوي دي.
هغه زیاته کړه: «څلور د اوبو شبکې دېشو ولسوالۍ کې رغول شوې دي چې خلک ترې استفاده کوي او ۶۰ د اوبو د تصفيې ماشینونه د خانشین ولسوالۍ په هغو سیمو کې فعال شوي چې اوسېدونکو یې هلته د څښاک پاکو اوبو ته لاسرسی نه درلود.»
ورته مهال د یادو ولسوالیو اوسېدونکي خوښ دي چې په خپلو کلیو کې ورته د څښاک پاکې اوبه برابرېږي.
خانشین او دېشو د لښکرګاه ښار جنوب ته په ۲۵۰ کلیومترۍ کې دوه هغه ولسوالۍ دي چې له کلونو راهیسې ورته هیڅ ډول پاملرنه نه ده شوې او اوسېدونکي یې د روغتیا، ښوونې او روزنې، بیارغونې او کرنې برخه کې له ګڼو ستونزو سره مخ دي.
Views: 13
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن