پلخمري (پژواک، ۲۷ غبرګولی ۱۴۰۳): د بغلان د ترافیکو مدیریت خبر ورکوي چې د دغه ولایت د مرکزي بغلان ولسوالۍ امنیه قوماندان او درېیو نورو کسانو یې په ترافیکي پېښه کې ژوند له لاسه ورکړی دی.
د بغلان د ترافیکو مدیر قاري نذیرالله عابدي د غبرګولي په ۲۷مه پژواک خبري اژانس ته وویل چې د دغه ولایت د مرکزي بغلان ولسوالۍ د امنیه قوماندان ملا اخترمحمد بریالي موټر تېره شپه د ګزمې پر مهال د دې ولسوالۍ زاړه ښار ته څېرمه ترافیکي پېښه کړې ده.
هغه زیاته کړه چې په دې پېښه کې امنیه قوماندان او ورسره سپرو درېیو کسانو یې ژوند له لاسه ورکړی دی.
عابدي د یادې ترافیکي پېښې څرنګوالي په اړه معلومات ور نه کړل خو د بغلان امنیې قوماندانۍ د امنیت امر عبدالغیور خادم پژواک ته وویل چې دغه ترافکي پېښه د موټر چپه کېدو له امله شوې ده.
د یادونې ده، تېره اونۍ د بغلان دوه قومي مشران هم په یوه ترافیکي پېښه کې مړه شوي وو.
Views: 30
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن