یو افغان پر موټرسایکل له جرمني لوګر ولایت ته راغلی

پل‌علم (پژواک، ۳۱ غبرګولی ۱۴۰۳): د لوګر د اطلاعاتو او کلتور ریاست وایي چې د محمدمنصور څاروان په نوم یو افغان له جرمني پر موټرسایکل دغه ولایت ته راغلی دی.

د لوګر د اطلاعاتو او کلتور رییس رفیع‌الله صمیم پژواک خبري اژانس ته وویل، محمد منصور څاروان اته کاله مخکې جرمني ته تللی و خو اوس له هغه ځایه پر موټرسایکل هېواد ته راغلی دی.

صمیم زیاته کړه، د اسلامي امارت له بیا واکمنېدو سره په ټول افغانستان کې امنیت ټینګ شوی او هر افغان کولای شي په ډاډه زړه خپل هېواد ته راشي.

بل لور ته، احمدمنصور څاروان پژواک ته وویل چې د اوو ورځو په موده کې له جرمني هېواد ته راورسېد.

نوموړي زیاته کړه: «له اوږدې مودې راهیسې مې دا هیله وه چې خپل هېواد ته د ځمکې له لارې پر موټرسایکل سفر وکړم او د هېواد بېلابېلې سیمې وګورم، دا هیله مې اوس پوره شوه.»

څاروان پر نورو بهرمېشتو افغانانو هم غږ وکړ چې هېواد ته راشي او له خپلو کورنیو او افغانانو سره په ډاډه زړه لیده کاته وکړي.

د یادونې ده، څاروان د لوګر د محمداغې ولسوالۍ اصلي اوسېدونکی او اته کاله مخکې جرمني هېواد ته کډوال شوی دی.