کابل (پژواک، ۳ چنګاښ ۱۴۰۳): د بهرنیو چارو وزارت وايي چې په لومړي ځل د نیکاراګوا هېواد له خوا د افغانستان لپاره په بېجینګ کې د غیرمستقیم سفیر له ګومارنې سره یې هوکړه کړې او هرکلی یې کوي.
د هېواد د بهرنیو چارو وزارت له لوري نن په خپره شوې خبرپاڼه کې راغلي: «د افغانستان اسلامي امارت د بهرنیو چارو وزارت په لومړي ځل د نیکاراګوا جمهوریت له خوا د افغانستان لپاره په بېجینګ کې د غیرمستقیم سفیر له ګومارنې سره موافقه کړې او هرکلی یې کوي.»
خبرپاڼه کاږي، د بهرنیو چارو وزارت په بېجینګ کې د اسلامي امارت لوی سفارت ته هدایت ورکړی چې په بېجینګ کې د نیکاراګوا له سفارت سره نږدې کاري اړیکې ولري.
د خبرپاڼې د معلوماتو له مخې، د بهرنیو چارو وزارت له نیکاراګوا جمهوریت سره د دیپلوماټیکو اړیکو رامنځ ته کېدل مثبت پرمختګ بولي او د دواړو هېوادونو ترمنځ د دوه اړخیزې لېوالتیا وړ برخو کې د اړیکو د لا زیاتې پراختیا هیله کوي.
فرانسپرېس خبري اژانس تېره شپه ناوخته راپور ورکړ چې په چین کې د نیکاراګوا هېواد اوسنی سفیر به د افغانستان اړوند چارې له بیجینګ څخه اداره کوي.
د راپور له مخې، د نیکاراګوا هېواد د ولسمشر مرستیال روزاریو موریلو د افغانستان لپاره د سفیر ټاکل کېدو موضوع تایید کړې ده.
Views: 14
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن