پکتیا کې د غره‌ښویېدنې پېښه کې د یوې کورنۍ اووه غړي مړه شوي

ګردېز (پژواک، ۴ چنګاښ ۱۴۰۳): د پکتیا ولایت په څمکنیو ولسوالۍ کې د غره ‌ښویېدنې له امله د یوې کورنۍ اووه کسان مړه شوي دي.

دغه خبر د پکتیا د پېښو پر وړاندې د چمتووالي ریاست له لوري پژواک خبري اژانس ته په رالېږل شوې خبرپاڼه کې راغلی دی.

سرچینه کاږي چې پرون مازدیګر د څمکنیو ولسوالۍ په جګ اورګوړ سیمه کې د غره یوه برخه ښویېدلې ده.

خبرپاڼه کې راغلي چې په دې پېښه کې د یوې کورنۍ دوه ښځې او پنځه ماشومان مړه شوي دي.

د یادونې ده، د روان کال په وري میاشت کې هم د پکتیا په وزې ځدران ولسوالۍ کې د غره ښویېدنې له امله د یوې کورنۍ پنځه غړي مړه شوي وو.