کابلوف وايي، مسکو اته کاله مخکې پوهېده چې ا.ا بیا واک ته رسېږي

کابل (پژواک، ۱۰ چنګاښ ۱۴۰۳): د افغانستان لپاره د روسیې ځانګړي استازي ویلي چې مسکو له «طالبانو» سره له بیاځلي واکمنېدو مخکې ښې اړیکې درلودې او دوی اته کاله مخکې پوهېدل چې بیا به د افغانستان واګې په لاس کې اخلي.

د افغانستان لپاره د روسیې ځانګړي استازي ضمیر کابلوف یادې څرګندونې له یوې هندي رسنۍ سره په خبرو کې کړې دي.

هغه ویلي: «پرېږدئ ووایم، شاوخوا اته کاله مخکې له دې چې کابل ونیسي، پوهېدم چې ټول افغانستان به ونیسي.»

د کابلوف په باور، د سرپرست حکومت چارواکو تر اوسه د نشه‌یي توکو د تولید مخنیوي برخه کې ډېر ګامونه پورته کړي دي.

هغه څرګنده کړې چې مسکو د افغانستان سرپرست حکومت له چارواکو تمه لري چې د نړۍوالې ترهګرۍ د کنټرول لپاره لا ډېره هڅه وکړي.

مخکې له دې، د روسیې بهرنیو چارو وزارت د دوحې ناسته کې د سرپرست حکومت د استازو د ګډون هرکلی کړی او ویلي یې وو چې دغه هېواد د افغانانو د مشروع ګټو په نظر کې نيولو سره د افغانستان د ستونزو هواري لپاره رغنده خبرو ته چمتو دى.

دا په داسې حال کې ده چې تازه د ذبیح‌الله مجاهد په رهبرۍ د اسلامي امارت پلاوي نن د دوحې په ناسته کې د افغانستان لپاره د روسیې له ځانګړي استازي ضمیر کابلوف سره لیدلي دي.

ذبیح‌الله مجاهد ویلي چې په دې لیدنه کې «روسیې د افغانستان له موقفه» ملاتړ وکړ.