د صنعت او سوداګرۍ وزارت د سرپرست په مشرۍ یو پلاوی ازبکستان ته لاړ

کابل (پژواک، ۱۲ چنګاښ ۱۴۰۳): د صنعت او سوداګرۍ وزارت وایي چې د دغه وزارت د سرپرست په مشرۍ د دولتي او خصوصي سکټور ګډ پلاوی ازبکستان ته لاړ.

د صنعت او سوداګرۍ وزارت پر خپله اېکس‌پاڼه لیکلي، نن سه شنبه (د چنګاښ ۱۲مه) د صنعت او سوداګرۍ وزارت د سرپرست نورالدین عزیزي په مشرۍ د دولتي او خصوصي سکټور ګډ پلاوی ازبکستان ته ولاړ.

یاد وزارت زیاته کړې، دغه پلاوی به د ازبکستان په تاشکند ښار کې د افغانستان د محصولاتو او تولیداتو د نندارتون په پرانیسته او د «تجارتي تواصل» په کنفرانس کې ګډون وکړي او د سوداګرۍ برخه کې به دوه اړخیزې خبرې وکړي.

سرچینې ویلي، عزیزي به په دغه سفر کې د سوداګرۍ، پانګونې او په سیمه کې د همکاریو جلبولو په ترڅنګ د اقتصادي اړیکو د پراختیا او پیاوړتیا په موخه د دغه هېواد له چارواکو سره خبرې وکړي.

دغه راز، د سوداګرۍ وزارت ویلي چې یاد نندارتون به نن پیل شي او درې ورځې به د خلکو پر مخ پرانیستی وي چې د افغانستان ۲۵۰ سوداګر او صنعتکاران به خپل محصولات او تولیدات لکه غالۍ، لاسي صنایع، قیمتي او نیمه‌قیمتي ډبرې او وچې مېوې په کې نندارې ته وړاندې کړي.