عزیزي: ازبکستان دې د افغانستان په شمال کې د نفت او ګازو په کانونو کې پانګونه وکړي

کابل (پژواک، ۱۶ چنګاښ ۱۴۰۳): د افغانستان د صنعت او سوداګرۍ وزارت سرپرست د ازبکستان جیولوجي او کانونو له وزیر سره په لیدنه کې ویلي چې تاشکند دې د هېواد په شمال کې د نفت او ګازو په کانونو کې پانګونه وکړي.

د صنعت او سوداګرۍ وزارت پر خپله اېکس‌پاڼه د دغه وزارت د سرپرست نورالدین عزیزي او د ازبکستان د جیولوجي او کانونو وزیر اسلاموف بوبیر فرخادویچ د لیدنې خبر ورکړی دی.

سرچینه وايي، عزیزي په دې لیدنه کې ازبکستاني لوري ته وړاندیز وکړ چې د غزني او هرات د مسو په کانونو او افغانستان کې د معدني توکو د پروسس فابریکو په رامنځته کولو کې پانګونه وکړي.

ورته مهال، فرخادویچ هم د کانونو په بېلابېلو برخو کې د دواړو هېوادونو پر نږدې همکاریو ټینګار کړی او د دواړو هېوادونو ترمنځ یې د ملاتړ د هوکړه‌لیک د لاسلیک غوښتنه وکړه.

نوموړي ازبکستان کې د مسو د پروسس برخه کې د دوو لویو کارخونو جوړېدو په اړه هم خبرې کړې‎ او زیاته کړې یې ده چې دا کارخونې خامو موادو ته اړتیا لري او له افغانستانه د مسو استخراج به دا اړتیا پوره کړي.

سرچینې دغه راز زیاته کړې، په پای کې وټاکل شوه چې د ازبکستان له خوا به د هېواد د کانونو او پټرولیم له وزارت سره په همغږۍ یو رسمي پلاوی د سروې او تخنیکي چارو په موخه افغانستان ته سفر وکړي.