کابل (پژواک، ۱۹ چنګاښ ۱۴۰۳): د کانونو او پټرولیم وزارت تازه ټاکل شوی سرپرست وايي، د اقتصادي بریالیتوب لپاره یوازېنۍ وسیله کانونو دي، اسلامي امارت تل هڅه کوي چې د مالیاتو فشار پر خلکو کم کړي او دا کار هغه مهال کېږي چې کانونه په ښه توګه مدیریت شي.
ملا هدایتالله بدري د کانونو او پټرولیم وزارت د سرپرست په توګه د یاد وزارت کارمندانو ته او شېخ شهابالدین دلاور د سرې میاشتې ټولنې د رییس په توګه د یادې ادارې کارکوونکو ته نن د بېلابېلو غونډو په ترڅ کې ور وپېژندل شول.
بدري د معرفي کولو په غونډه کې وویل، تغییر او تبدیل په هر نظام کې یو اصل دی، اسلامي امارت د ټولو ګډ کور دی او په دې کور کې به هر څوک خپل مسوولیت د مشرتابه له لزوم دید سره سم ادا کوي.
دی وايي، د ځمکې پېژندنې د پوهانو د تازه څېړنو له مخې، د افغانستان شته معدني زېرمې شاوخوا درې تریلیون ډالر ارزښت لري خو د تېرو څو لسیزو ناخوالو په پایله کې له دغو زېرمو څخه ګټه نه ده پورته شوې.
هغه زیاته کړه، د اقتصادي بریالیتوب لپاره یوازېنۍ وسیله معادن دي چې باید په ښه توګه مدیریت شي، اسلامي امارت تل هڅه کوي چې د مالیاتو فشار پر خلکو باندې کم شي او دا کار هغه مهال ترسره کېږي چې معادن په ښه توګه مدیریت شي.
د نوموړي د معلوماتو له مخې، افغانستان کې له سیاسي بدلون مخکې ډېر معادن په قاچاقي توګه بهر ته انتقالېدل خو اوس یې مخه نیول شوې ده.
بدري همدارنګه وویل، کانونه د افغانستان د ولس پانګه ده او باید د ولس د ارامۍ، سوکالۍ، د افغانستان د ابادۍ او پرمختګ لپاره وکارول شي.
هغه د افغانستان له خلکو وغوښتل چې د معادنو په ساتلو کې خپل ملي مسوولیت ادا کړي.
هغه زیاته کړه: «موږ او تاسو به ګډ د معادنو لپاره اساسي کرښې او لومړیتوبونه وټاکو، داخلي او بهرنۍ پانګونه به جذبوو، هڅه به کوو چې معادن په داخل کې پروسس او د خامو موادو د صادراتو مخه ونیول شي، قراردادونه په بشپړ شفافیت سره طی مراحل کړو.»
د کانونو او پټرولیم وزارت مخکني سرپرست او د سرې میاشتې ټولنې نوي سرپرست شېخ شهابالدین دلاور د معرفي په مراسمو کې د اسلامي امارت له مشرتابه پر اطاعت کولو ټینګار وکړ او ویې ویل، نظام چې خرابېږي په جنجال د مشرانو خرابېږي.
دی وايي، هغه مهال چې د کانونو وزارت ته راغی، قسم یې وکړ چې له کانونو به جایزه او ناجایزه استفاده نه کوي.
هغه زیاته کړه چې یوازې د اسلامي نظام لپاره به نور هم خدمت وکړي.
دلاور همدارنګه وویل: «معادن د افغانستان هغه امانت دی چې د شوربازار هندو هم په کې حق لري، په دې کې غفلت په ورځ د قیامت د شوربازار د هندو به هم لاس زموږ په ګرېوان کې وي.»
د سرې میاشتې ټولنې مخکني سرپرست مولوي مطیعالحق خالص په یاده غونډه کې وویل چې اطاعت د اسلامي نظام مزایا ده او دغه راز د یادې ټولنې نوي سرپرست شېخ شهابالدین دلاور د ښه خدمت کولو ژمنه وکړه.
د یادونې ده چې د اسلامي امارت د مشرتابه د حکم له مخې د چنګاښ په ۱۶مه د افغانستان بانک مخکنی سرپرست ملا هدایتالله بدري د کانونو او پټرولیم وزارت د سرپرست په توګه او د یاد وزارت مخکنی سرپرست شېخ شهابالدین دلاورد افغاني سرې میاشتې ټولنې د سرپرست په توګه وټاکل شول.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن