کابل (پژواک، ۲۱ چنګاښ ۱۴۰۳): د پاکستان د حکومت کابینې اعلان کړی چې د ثبت شوو افغان کډوالو د اوسېدو موده یې د یوه بل کال لپاره وغځوله.
رویټرز راپور ورکړی چې د پاکستان د دولت کابینې یاده پرېکړه پرون (چهارشنبه، د چنګاښ ۲۰مه) کړې او له مخې یې، د «پېاوار» کارت لرونکي کډوال کولای شي د ۲۰۲۵ کال د جون تر ۳۰مې په پاکستان کې پاتې شي.
د پاکستان حکومت د یوې اعلامیې په خپرولو ویلي: «د فدرال کابینې د ۱،۴۵ میلیون افغان کډوالو د اوسېدو نېټه یو کار نوره هم وغځوله.»
د پاکستان حکومت یاده پرېکړه پاکستان ته د کډوالو لپاره د ملګرو ملتونو سازمان د عالي کمېشنر فیلیپو ګراندي له درې ورځني سفر وروسته اعلان شوې ده.
د کډوالو چارو کې د ملګرو ملتونو عالي کمېشنر فیلیپو ګراندي پاکستان ته په درې ورځني سفر کې د افغان کډوالو د ستونزو په اړه د دغه هېواد له ځینو چارواکو سره غږېدلی و.
د ویلو ده، پاکستان د تېر کال په اکتوبر میاشت کې د افغان کډوالو د ایستلو لړۍ پیل کړه او د راپورونو له مخې، دغه هېواد تر اوسه څه باندې نیم میلیون افغان کډوال په زور ایستلي دي.
Views: 16
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن