سېلابونو د بدخشان په جرم ولسوالۍ کې خلکو ته درانه مالي زیانونه اړولي

فیض‌آباد (پژواک، ۲۴ چنګاښ ۱۴۰۳): بدخشان کې ځايي مسوولین وایي، د دغه ولایت په جرم ولسوالۍ کې د سېلابونو راوتلو له امله لسګونه څاروي تلف شوي، کرنیزې ځمکې، یو کوچنی د برېښنا بند او د اوبو کانالونه ویجاړ شوي دي.

د بدخشان د طبیعي پېښو پر وړاندې د چمتووالي ادارې رییس مولوي محمداکرم اکبري وايي له پرون ماسپښین وروسته د جرم ولسوالۍ اړوند په سندر دره خستک سیمه کې د ورښت له امله سخت سېلابونو راوتلي دي.

هغه زیاته کړه، لومړنۍ شمېرې ښيي چې د دغو سېلابونو له امله ۲۰۰ څاروي تلف شوي، کرنیزې ځمکې، د اوبو کانالونه، د برېښنا یو کوچنی بند او یو شمېر کورونه ویجاړ شوي خو چاته په‌کې ځاني زیان نه دی رسېدلی.

نوموړي زیاته کړه چې د اوښتو زیاتونو د څېړلو لپاره له فیض‌اباد ښاره یو ټیم د جرم ولسوالۍ سندر دره خستک سیمې ته استول شوی دی.