کابل (پژواک، ۲۸ چنګاښ ۱۴۰۳): د بایسکلځغلولو نړۍوال فدراسیون وایي چې د دغه فدراسیون د اخلاقو کمېسیون د افغانستان د بایسکلځغلونې فدراسیون د مشر ټول فعالیتونه د ۱۵ میاشتو لپاره له دې امله چې له خپل موقفه یې ناوړه ګټه اخیستې ده، ځنډولي دي.
د بایسکلځلغونې (UCI) نړۍوال فدراسیون د جولای په ۱۶مه په یوه اعلامیه کې ویلي، د دغه فدراسیون د اخلاقو کمېسیون پرېکړه کړې چې د افغانستان د بایسکلځغلونې فدراسیون د مشر فضلاحمد فضلي د بایسکلچلولو ټول فعالیتونه د ۱۵ میاشتو لپاره وځنډوي.
په اعلامیه کې زیاته شوې چې د دغه بندیز لامل له خپل موقفه ناوړه ګټه اخیستنه او افغان بایسکلځغلوونکو ته د ګواښونکو پیغامونو استول ښودل شوي دي.
په خبرپاڼه کې راغلي، د افغانستان د بایسکلځغلونې فدراسیون مشر څو ځلې د بایسکلځغلونې غړو ته داسې پیغامونه استولي چې د بایسکلچلولو نړۍوال فدراسیون له پنځمې، شپږمې، څلورمې، دویمې او لومړۍ مادو سرغړونه بلل شوې ده.
د معلوماتو له مخې، د افغانستان د بایسکل ځغلولو فدراسیون مشر له هېواده بهر اوسېږي.
پژواک هڅه وکړه چې له فضلي سره د یادې موضوع په اړه اړیکه ونیسي خو بریالی نه شو؛ د المپیک ملي کمېټې هم تر اوسه په دې اړه څه نه دي ویلي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن