سپینه ماڼۍ وايي، جو بایډن پر کرونا ناروغۍ اخته شوی

کابل (پژواک، ۲۸ چنګاښ ۱۴۰۳): سپینې ماڼۍ اعلان کړی چې د امریکا ولسمشر جو بایډن پر کرونا ناروغۍ اخته شوی دی.

سپینې ماڼۍ نن (پنج‌شنبه) په یوه اعلامیه کې لیکلي چې بایډن به ځان قرنطین کړي، خو له کور څخه به د خپلو دندو ترسره کولو ته دوام ورکړي.

په اعلامیه کې راغلي چې بایډن پرون له کمزورو علایمو سره ‎ډاکټر ته مراجعه کړې او دې ته په پام چې حالت یې ښه نه و، د کرونا ازمایښت ترسره شو چې پایله یې مثبته وه.

جو بایډن په داسې حال کې پر کرونا ویروس اخته شوی چې د ډېر عمر له امله پرې دویمې دورې ولسمشرۍ ته له نوماندۍ لاس اخیستلو لپاره فشارونه ډېر شوي دي.

خو بایډن ټینګار کړی چې ټاکنیزو رقابتونو ته به تر پایه دوام ورکړي او خپل سیال دونالد ټرمپ ته به ماته ورکړي.