فیروزکوه (پژواک، ۲۲ زمری ۱۴۰۳): غور کې ځايي سرچینې وايي چې په دغه ولایت کې د ترافیکي پېښې له امله دوه کسان مړه او پنځه نور ټپیان شوي دي.
د غور د اطلاعات او فرهنګ ریاست د نشراتو امر مولوي محمدحماس پژواک خبري اژانس ته وویل چې د فیروزکوه ښار په «کندیوال» کلي د فلانکوچ موټر چپه کېدو له امله یوه ښځه او یو ماشوم مړه او د یوې ښځې په ګډون پنځه نور کسان ټپیان شوي دي.
هغه زیاته کړه: «یو فلانکوچ موټر نن سهار (دوشنبه، د زمري ۲۲مه) چې د فیروزکوه ښار سوېل غورقند کلي ته پر لاره وه، له سړکه وتلی او چپه شوی چې له امله یې یوه ښځه او یو ماشوم مړه او پنځه نور کسان ټپیان شوي دي.»
د هغه د معلوماتو له مخې، د پېښې ټپیان ولایتي روغتون ته لېږدول شوي دي.
د نوموړي په وینا، د پېښې لامل تر اوسه معلوم نه دی خو ډېری دغه ډول پېښې د سړکونو خرابوالي، ډېر سرعت او د موټرچلوونکي بېاحتیاطي له امله کېږي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن