قطر پکتیا کې بې‌ځایه شوو او راستنو شوو ته پنځوس کورونه جوړوي

کابل (پژواک، ۳۰ زمری ۱۴۰۳): د قطر سره میاشت د پکتیا په مرکز ګردېز کې بې‌ځایه شوو او راستنو شوو ته پنځوس کورونه، ښوونځی، مدرسه، روغتیايي مرکز او تفریحي پارک جوړوي.

د افغانستان د کډوالو چارو وزارت نن پر خپله اېکس‌پاڼه لیکلي چې د قطر سرې میاشتې رییس احمد العثماني دغه څرګندونې د یاد وزارت له سرپرست خلیل‌الرحمن حقاني سره  په لیدنه کې کړې دي.

سرچینې زیاته کړې، په دې لیدنه کې احمد العثماني ویلي، غواړي د کډوالو چارو له وزارت سره په همغږۍ د پکتیا د مرکز ګردېز اړوند رباط سیمه کې د مستحقینو، بې‌ځایه شوو او راستنو شوو لپاره پنځوس کورونه، یو ښوونځی، یوه مدرسه، یو روغتیايي کلینیک او یو تفریحي پارک جوړ کړي.

خو سرچینې د دغو تاسیساتو د کار د پیل د وخت او لګښت په اړه جزئیات نه دي ورکړي.

د سرچینې د معلوماتو له مخې، د کډوالو چارو وزارت سرپرست د قطر سرې میاشتې د ښه نیت ستاینه وکړه او په دې برخه کې یې د بشپړې همکارۍ ډاډ ورکړ.