مهترلام (پژواک، د وږي لومړۍ نېټه ۱۴۰۳): لغمان کې ځايي مسوولین وایي، د دغه ولایت مرکز او درېیو ولسوالیو کې د تېرې ورځې او شپې ورښتونو او سېلابونو له امله څلورو کسانو ته مرګژوبله اوښتې، سلګونه جریب کرنیزه ځمکه تخریب شوې او نږدې ۵۰ کورونو زیانمن شوي دي.
د لغمان ولایت د طبیعي پېښو پر وړاندې د مبارزې او چمتووالي رییس قاري خیرمحمد غازي پژواک خبري اژانس ته وویل، تېره ورځ ماذیګر مهال د مهترلام ښار ترڅنګ الیشنګ، بادپښ او الینګار ولسوالیو کې د ورښتونو او سېلابونو له امله خلکو ته مالي او ځاني زیانونه اوښتي دي.
قاري غازي وویل: «د الینګار ولسوالي اړوند ساودره کې یوه مېرمن د سېلاب اوبو وړې او مړه شوې ده او په مرکز، الیشنګ او بادپښ ولسوالیو کې درې کسان ټپيان شوي، سلګونه جریب زراعتي ځمکې او ۴۵ د استوګنې کورونه په کلي او قسمي توګه تخریب شوي دي.»
د هغه په خبره، له زیانمنو شوو کورنیو سره یې د اوس لپاره د یوه اندازې غیرخوراکي توکو او د کور وسایلو مرسته کړې خو غوښتنه کوي چې مرستندویه بنسټونه باید دغه ولایت کې له سېلابځپلو سره مرستې وکړي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن