<p style="text-align: justify;">کابل (پژواک، ۶ وږی ۱۴۰۳): د المپیک ملي کمېټې او سپورټ عمومي ریاست وایي، په هېواد کې ازادې سیالۍ (فريفایټ) ځکه بندې شوې چې دغه لوبې له تاوتریخوالي ډکې دي او د لوبغاړو د مرګ ګواښ پکې دی.</p>
<p style="text-align: justify;">د المپیک ملي کمېټې او سپورټ عمومي رییس احمدالله وثیق طلوعنیوز ته ویلي، د امربالمعروف او نهې عنالمنکر له وزارته یې رسمي مکتوب ترلاسه کړی چې پکې ویل شوي دغه لوبه له تاوتریخوالي ډکه ده او د لوبغاړو د مرګ ګواښ پکې دی، نو له همد امله بندې شوې دي.</p>
<p style="text-align: justify;">په یاد ریاست کې یوې بلې باوري سرچينې هم پژواک خبري اژانس ته وویل چې دغه لوبې بندې شوي دي.</p>
<p style="text-align: justify;">هغه وویل، د امربالمعروف نهيالمنکر او شکایتونو اورېدو وزارت د اسلامي امارت له مشرتابه د یادو لوبو د بندېدو ترڅنګ د ځینو نور منکراتو د بندېدو غوښتنه هم کړې وه او هغه هم منظوره کړې ده.</p>
<p style="text-align: justify;">یاده سرچينه وایي چې د ازادو سیالیو د بندېدو په اړه یې نن سهار د امر بالمعروف وزارت مکتوب ترلاسه کړی دی.</p>
<p style="text-align: justify;">دا په داسې حال کې ده چې پر ټولنیزو پاڼو د ازادې مبارزې او ځینو نورو مسایلو په اړه د امر بالمعروف، نهی عنالمنکر او شکایتونو اورېدو وزارت ته منسوب یو مکتوب یا وړاندیز لاس په لاس کېږي خو رسمي سرچینو یې تراوسه په اړه څه نه دي ویلي.</p>
<p style="text-align: justify;">په دغه مکتوب کې راغلي: «په موجود دور کې د بوکس (ازادې مبارزې) په نوم چې کومه لوبه کیږي د المپیک مربوط ده او ورته جواز ورکوي، په دې کې مقابل ته سخت نقصان رسولی شي، د هغه سترګو د ړندېدو خطر وي د هغه د دماغو د زخمي کېدو خطر وي، تر دې چې د مرګ خطر هم په کې وي، نو په اسلامي شریعت کې دغه شان لوبه ناجایز ده ځکه په دې کې خپل ځان په زوره هلاکت کې غورځول دي او دا منع دی.»</p>
<p style="text-align: justify;">په یاد مکتوب کې راغلي چې د شته معلوماتو پراساس د هېواد په یو شمېر امارتي ادارو کې ځینې منکرات شتون لري؛ لکه د کار د پیل په وخت کې پټۍ پرېکول چې باید ځان ترې وساتل شي، ځکه چې په دغه کار کې د غیر مسلمو سره تشبیه ده.</p>
<p style="text-align: justify;">دغهراز، په متن کې راغلي: «د هغو ورځو نمانځل چې په اسلام کې یې ثواب نه وي راغلی او د غیرمسلمو ایجاد وي؛ لکه د معلم ورځې نمانځل، د مور د ورځې نمانځل، د مینانو ورځې نمانځل او داسې نورو ورځو نمانځل، د دې وزارت له خوا منع شوي دي؛ ځکه چې له غیرمسلمو سره تشبیه ده.»</p>
<p style="text-align: justify;">په مکتوب کې راغلي چې د امارتي ادارو په دهلېزونو او زینو کې پر قالینو له بوټانو سره ګرځېدل هم په یادو منکراتو کې راځي، ځکه چې په دې کې د مال ضیاع او له کفارو سره تشبیه ده.</p>
<p style="text-align: justify;">د یاد مکتوب په پای کې د اسلامي امارت مشرتابه ته وړاندیز شوی څو د هېواد په امارتي او غیرامارتي ادارو کې له ذکر شوو منکراتو څخه د مخنیوي په موخه لکه څرنګه چې لازم ګڼي لارښوونه وکړي.</p>
<p style="text-align: justify;"></p>
