کابل (پژواک، ۱۰ وږی ۱۴۰۳): دفاع وزارت سپیناوی ورکړی چې د هوایي حریم ساتنې لپاره د تجهیزاتو پېرلو په اړه له روسي چارواکو سره تر اوسه هيڅ خبرې نه دي شوې او په دې اړه د دفاع وزارت د لوژستیک د رییس خبرې تحریف شوې دي.
دفاع وزارت دغه سپیناوی په داسې حال کې کوي چې له دې مخکې د روسیې خبري اژانس ټاس تېره ورځ په یوه راپور کې ویلي وو چې د دفاع وزارت د لوژستیک رییس عبدالبصیر صابري له دغه اژانس سره په خبرو کې ویلي چې اسلامي امارت پلان لري د افغانستان هوایي حریم ساتنې لپاره روسي تجهیزات وپېري.
خو د دفاع وزارت ویاند عنایتالله خوارزمي پر خپله اېکسپاڼه د دفاع وزارت د لوژستیک د رییس خبرې د ټاس خبري اژانس له خوا تحریف شوې وبللې.
هغه زیاته کړې: «د هوایي حریم ساتنې لپاره د وسلو پېرلو په اړه تر اوسه له روسي چارواکو سره خبرې نه دي شوې.»
دا په داسې حال کې ده چې له دې مخکې د دفاع وزیر ملا محمدیعقوب مجاهد د افغانستان هوایي حریم کې د بېپیلوټه الوتکو ګرځېدو ته په اشاره ویلي وو، اسلامي امارت هڅه کوي چې د هېواد هوایي حریم کنټرول په خپل لاس کې واخلي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن