د دفاع وزارت: سلګونه نور پوځي وسایط ترمیم شول

کابل (پژواک، ۲۰ وږی ۱۴۰۳): د افغانستان ملي دفاع وزارت وايي چې د دغه وزارت د ځانګړو ځواکونو فرقې ورکشاپ کې څه باندې زر بېلابېل ډول پوځي وسایط ترمیم شوي دي.

ملي دفاع وزارت نن پر خپله اېکس‌پاڼه ليکلي چې د یاد وزارت د ځانګړو ځواکونو فرقې په ګارنیزیون کې ۱۱۴۵ عرادې بېلابېل ډول پوځي وسایط چې له تېرو څو کلونو راهيسې ویجاړ پراته وو، د تخنیکي ټیم له لوري ترمیم او ګټې اخيستنې ته چمتو شول.

سرچينې د جزئياتو له ورکولو پرته ليکلي چې په دغو وسایطو کې ډېر شمېر ضربتي ټانکونه، زرهي هاموې ټانکونه، رینجر، څلور ټایره موټرسایکلونه، لوی او واړه امبولانسونه او پوځي انټرنېشنل موټر شامل دي.

له دې مخکې هم د یاد وزارت اړوند په ۲۰۳ منصوري قول‌اردو کې ۳۲ بېلابېل ډول پوځي وسایط ترمیم شوي وو.