یو ځوان د بدخشان په کوکچې سیند کې ډوبېدو له امله مړ شوی

فیض‌اباد (پژواک، ۴ تله ۱۴۰۳): بدخشان کې ځایي مسوولین وايي، د دغه ولایت د پوهنتون یو محصل کوکچه سیند کې د لامبو پر مهال ډوب شوی او ژوند یې له لاسه ورکړی دی.

د بدخشان د اطلاعاتو او فرهنګ ریاست د اطلاعاتو امر حکمت‌الله محمدي وايي، د ننګرهار یو اوسېدونکی چې د بدخشان پوهنتون د اقتصاد پوهنځي د لومړي کال محصل و، پرون مازیګر په داسې حال کې چې د فیض‌اباد ښار اړوند کوکچه سیند کې یې لامبو وهله، ډوب شوی او ژوند یې له لاسه ورکړی دی.

نوموړي زیاته کړه، د یاد ځوان مړی له اوبو راایستل شوی او خپل ټاټوبي ته لېږدول شوی دی.