د غور ښاروالي: تېرو شپږو میاشتو کې مو څه باندې ۱۸ میلیونه افغانۍ عواید راټول کړي

فېروزکوه (پژواک، ۱۹ تله ۱۴۰۳): د فېروزکوه د ښاروالي مسوولین وايي، په تېرو شپږو میاشتو کې یې څه باندې ۱۸ میلیونه افغانۍ عواید راټول کړي او د دغه ولایت له اوسېدونکو غواړي چې د خپلو مالیاتو او د خپلو جایدادونو د صفایي پیسو په ورکولو له دې ادارې سره همکاري وکړي.

د فېروزکوه ښاروال مولوي امین‌الله شریفي نن (پنج‌شنبه، د تلې ۱۹مه) دغه ولایت کې یوه ناسته کې وویل چې د روان کال د شپږو میاشتو په ترڅ کې یې څه باندې ۱۸ میلیونه افغانۍ عواید راټول کړي دي.

هغه وویل: «د ښاروالۍ عواید د خلکو بودجه ده چې له هغو د ښاري زېربناوو بیارغونې او خلکو ته د اسانتیاوو رامنځته کولو په موخه استفاده کېږي، د فېروزکوه ښاروالۍ هڅه کوي څو خلکو ته غوره خدمات وړاندې کړي او دا اداره د عوایدو د هرې روپۍ حساب‌ورکوونکې ده.»

نوموړي دغه‌ راز د دې ادارې د پروژو د ښه تطبیق په موخه له خلکو وغوښتل چې ښاري فرهنګ دې رعایت او له دې ادارې سره دې هر اړخیزه همکاري وکړي.

د غور ولایت د مقام استازي مولوي مقیم اقا دې ناسته کې خلکو ته پر موقع د خدماتو او اسانتیاوو رامنځته کولو په موخه د فېروزکوه ښاروالۍ له هڅو مننه وکړه او ویې ویل چې ځایي اداره به د زېربنایي پروژو د تطبیق په موخه له ښاروالي سره مرسته کوي.

نوموړي د غور له اوسېدونکو غوښتنه وکړه څو د خپلو مالیاتو او د خپلو جایدادونو د صفایي پیسو په ورکولو له ښاروالۍ سره همکاري وکړي څو دا اداره وکولای شي ګتورې پروژې تطبیق کړي.