له افغانستان په تېرو شپږو میاشتو کې د ۷۷،۵ میلیون ډالرو په ارزښت انجه او زعفران بهر ته صادر شوي

کابل (پژواک، ۲۶ تله ۱۴۰۳): د صنعت او سوداګرۍ وزارت وايي، د روان لمریز کال په تېرو شپږو میاشتو کې له افغانستانه د ۷۷،۵ میلیون امریکايي ډالرو په ارزښت انجه او زعفران بهر ته صادر شوي دي.

د صنعت او سوداګرۍ وزارت ویاند اخندزاده عبدالسلام جواد یادې څرګندونې نن په یوه ویډیویي کلیپ کې کړې دي.

هغه زیاته کړې، د روان ۱۴۰۳ لمریز کال په تېرو شپږو میاشتو کې له افغانستانه د ۵۷ میلیون امریکايي ډالرو په ارزښت ۶۱۷ ټنه انجه بهر ته صادر شوې ده.

هغه زیاته کړې، یاده اندازه انجه هندوستان، ازبکستان، امریکا، متحده عربي اماراتو او ایران ته صادر شوې ده.

د صنعت او سوداګرۍ وزارت ویاند ویلي چې دغه راز په یاده موده کې د ۲۰،۵ میلیون امریکایي ډالرو په ارزښت ۱۸ ټنه زعفران هم بهر ته صادر شوي دي.

د جواد د معلوماتو له مخې، یاده اندازه زعفران هند، هسپانیا، سعودي، امریکا، متحده عربي اماراتو، فرانسې، المان او انګلیستان ته صادر شوي دي.