هلمند کې کروندګرو ته د غنمو اصلاح شوي تخم او کېمیاوي سرې د وېشلو لړۍ پيل شوه

لښکرګاه (پژواک، د لړم لومړۍ نېټه ۱۴۰۳): د هلمند ولایت په ۱۸ ولسوالیو کې پر څه باندې ۵۵ زره کروندګرو د غنمو د اصلاح شوي تخم او کېمیاوي سرې د وېشلو لړۍ پیل شوه.

دغه مرسته د هلمند ولایت د کرنې، اوبولګولو او مالدارۍ ریاست له لوري د «جک» موسسې په مالي ملاتړ ۵۵ زره او ۱۰۰ کروندګرو ته وېشل کېږي.

په هلمند ولایت کې د افغانانو د پوهې کچې او وړتیاوو لوړولو موسسه (جک) مسوول ذبیح‌الله سهیل پژواک خبري اژانس ته وویل چې په دغو مرستو کې هر کروندګر ته ۵۰ کیلوګرامه د غنمو اصلاح شوی تخم، ۵۰ کیلوګرامه توره او ۵۰ کیلوګرامه سپینه کیمیاوي سره ورکول کیږي.