ننګرهار کې د ۷۰۰ لوبغاړو په ګډون د غېږنيونې سيالۍ پيل شوې

جلال‌اباد (پژواک، ۶ لړم ۱۴۰۳): په ننګرهار ولايت کې د بدني روزنې او سپورټ رياست له لوري د ځوانو لوبغاړو د هڅونې او له نشه‌يي توکو سره د مبارزې په موخه د غېږنیونې درې ورځنۍ سيالۍ پيل شوې.

مسوولین وايي، په دغو سياليو کې د غېږنيونې ۷۰۰ لوبغاړو چې د دغه ولايت د بېلابېلو کلبونو غړي دي، برخه لري او په څلورو کټګوريو کې به سيالۍ ترسره کړي.

د ننګرهار د بدني روزنې او ورزش رياست له لوري د لړم په ۶مه پژواک خبري اژانس ته په رالېږل شوې خبرپاڼه کې راغلي چې د دغه رياست په لارښوونه د جلال‌اباد ښار پنځمې ناحیې ورزشي جمنازيوم کې د پهلوانۍ سيالۍ پيل شوې.

سرچینه وايي، دغه سيالۍ له نشه‌یي توکو د ځوانانو راګرځولو، عامه پوهاوي او د ورزشکارانو هڅونې په موخه پیل شوې.

خبرپاڼه کې دغه راز راغلي چې دغه سیالۍ د ننګرهار په کچه د ۷۰۰ لوبغاړو په ګډون په څلورو سني کټګوریو (کوچنیان، نوي ځوانان، ځوانان او لویانو) کې ترسره کېږي چې موخه یې د غوره ورزشکارانو ټاکل دي.

د جلال‌اباد ښار د پهلوانۍ يوه کلب غړی اميرالله وايي، دا ډول سيالۍ د دوی د هڅونې او په راتلونکي کې د پرمختګ لپاره ډېرې ګټورې دي.

دا سيالۍ چې نن پيل شوې، درې ورځې به دوام وکړي او هره ورځ به يې نندارې ته سلګونه خلک ورځي.