جلالاباد (پژواک، ۷ لړم ۱۴۰۳): د ننګرهار په مرکز جلالاباد ښار کې د ۱۱ ميليونه او ۶۰۰ زره افغانيو په لګښت د درېيو فرعي سړکونو بیارغونې چارې پيل شوې.
مسوولین وايي، د دویمې ناحیې اړوند دغه سړکونه کلونه مخکې جوړ شوي چې ډېر تخریب شوي او بیارغونې ته يې اړتیا درلوده چې نن (د لړم ۷مه) يې چارې پيل شوې.
د جلالاباد ښاروال مولوي نقيبالله طارق د دغو چارو د پیل پر مهال وويل، د ښاروالۍ د ۱۴۰۳ کال انکشافي پروژو په دوام نن د د دویمې ناحیې په مربوطاتو کې د سمنټو، مالګې او کهنهفروشۍ کوڅو د سړکونو بیارغونه پيل شوه.
هغه زیاته کړه، د دغو سړکونو اوږدوالی ۱۱۲۰ متره او سور یې ۶،۵ متره دی، ټول لګښت یې ۱۱،۶ میلیونه افغانۍ کېږي چې د ښاروالۍ له داخلي بودجې ورکول کېږي.
نوموړي له ښاريانو او د دغو سیمو له هټۍوالو وغوښتل چې د ښار په ټولو برخو کې د سړکونو په ساتنه او مراقبت کې همکاري وکړي؛ ځکه چې بېرته رغونه یې ډېر لګښت غواړي.
دغه راز، د کهنهفروشۍ سيمې يو هټۍوال عبدالله وايي چې د دغه سړک د خرابوالي له امله نه يوازې هټۍوال، بلکې عام خلک او موټرچلوونکي هم ډېر په ستونزو کې دي.
هغه هيله وښوده چې د دې سیمې سړک په جوړېدو سره به خلکو د راتګ راتګ ستونزه حل شي.
د جلالاباد ښاروالۍ مسوولين وايي، د ښار په مختلفو برخو کې ټول هغه سړکونه چې تخریب شوي له سره په اساسې او معیاري توګه جوړوي چې خلکو ته اسانتیاوې رامنځته شي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن