بلخ کې هر کال د غواګانو له فارمونو ۱۰۵۰ مټریک ټنه شیدې تولیدېږي

مزارشریف (پژواک، ۲۷ لړم ۱۴۰۳): د بلخ کرنې، اوبو لګولو او مالدارۍ ریاست مسوولین وايي، په دغه ولایت کې د غواګانو ۳۲ لوی فارمونو فعاله دي چې په کلني ډول ۱۰۵۰ ټنه شیدې تولیدوي.

د مسوولینو په خبره، په دې وروستیو کې په بلخ ولایت کې د غواګانو ساتنې فارمونو جوړولو ته د خلکو لېوالتیا زیاته شوې او په وینا یې، د زراعتي غواګانو نسل کال په کال مخ پر ډېرېدو دی.

د بلخ ولایت د کرنې، اوبولګولو او مالدارۍ ریاست د څارویو د ترویج مدير غلام‌محمد محمدي پژواک ته وویل، اوس مهال د دغه ولایت په کچه د غواګانو د ساتنې ٣٢ لوی او واړه فارمونه ثبت دي چې شاوخوا سل زره غواګانې په کې ساتل کېږي.

هغه وایي: «په ټوله کې د بلخ ولایت په دوولس ګونو ناحيو او پنځلسو ولسوالیو کې د غواګانو ٣٢ فارمونه موږ سره ثبت دي. په دغه فارمونو کې له ٩٠ زره نیولې تر سل زره غواګانې شته او هر کال څه باندې دوه زره خوسیانې هم پیدا کېږي، يعني هر کال د غواګانو نسل دوه زره ډیرېږي.»

هغه همداراز وایي، حکومت د څارویو په ځانګړې توګه د غواګانو فارمونو ته پاملرنه کوي او د ترویج لپاره يې فارم لرونکو ته بېلابېلې مرستې او سمينارونه هم ورکړي دي.

د محمدي په خبره، بلخ کې د غواګانو له فارمونو هر کال سلګونه مټريک ټنه شېدې را ټولېږي چې د پروسس لپاره يې په مزارشريف ښار کې د لبنياتو درې لويې کارخونې هم جوړې شوې دي.

نوموړی وایي: «له دغه شمېر فارمونو هر کال ۱۰۵۰ مټريک ټنه شیدې راټولېږي چې د پروسس لپاره يې مزار شريف ښار کې د خصوصي سکټور په مرسته درې لويې کارخونې جوړې شوي، دغه کارخونې پر دغو فارمونو سربېره د عامو خلكو له کورونو څخه هم شېدې په مناسبه بیه اخلي او بیا ترې د لبنياتو په جوړولو کې ګټه اخلي.»

بلخوا، په مزارشريف ښار کې یو فارم لرونکی محمدشاهد د غواګانو ساتنه ګټوره بولي او وايي چې په دې وروستیو کلونو کې یې له ځينو اروپايي هېوادونو څخه هم داسې غواګانې راوستي چې اوږدمهاله او ډېرې شېدې ورکوي.

هغه له مرستندویه موسسو د ملاتړ غوښتنه کوي او له سوداګرو هم غواړي چې د شېدو پروسس او لبنياتو د تولید برخه کې پانګونه وکړي؛ څو هېواد له دغه اړخه پر ځان بسیا شي.

هغه وایي: «حکومت له موږ سره څه‌ناڅه مرسته کړې؛ خو زموږ غوښتنه له مرستندویه موسسو دا ده چې موږ ته د غواګانو د روزنې برخه کې سیمينارونه راکړي او ترڅنګ يې د ساتنې لپاره بوس، کنجاړه او واکسین هم راکړي. له سوداګرو غواړو چې د شیدو پروسس برخه کې پانګونه وکړي؛ څو لبنیات تولید شي او موږ پر ځان بسیا شو.»

د بشیراحمد په نوم یو بل فارم‌لرونکی هم وایي: «د مسوولینو مسوولیت دا دی چې د فارم لرونکو مالونه وقایه او د ناروغۍ درملنه یې وکړي او بل دا چې ځینې موسسې وخت ناوخت په ځينو برخو کې مالي مرسته کوي. له هېوادوالو غواړو چې په خپل هېواد کې فارمونه جوړ کړي؛ ځکه ګټه یې ټولو خلک ته رسېږي.»

د بلخ کرنې، اوبولګولو او مالدارۍ رياست د معلوماتو له مخې، د دغه ولایت اوسېدونکي په کلني ډول ١٠٨٠ مټريک ټنه ‎شېدې مصرفوي.