فاریاب کي د ترافیکي پېښو له امله درې کسان مړه شوي

میمنه (پژواک، ۳۰ لړم ۱۴۰۳): فاریاب کې ځايي سرچینې وايي، دغه ولایت کې د درېیو جلا پېښو له امله درې کسان مړه شوي او یو بل ټپي شوی دی.

د فاریاب د خان‌چهارباغ ولسوالۍ د پېښې ځای د څېړنې امر پژواک خبري اژانس ته وویل، پرون د دې ولسوالۍ په «خواجه قدوق» سیمه کې د فاریاب – جوزجان پر لویه لار یو فورنر موټر له سړکه وتلی چې په پایله کې یو کس مړ او یو بل ټپي شوی دی.

ورته مهال، ځايي سرچینې وايي چې نن یوه کس د میمنې ښار پر «چهار سماوار» سړک د یوه موټرسایکل د ټکر له امله او تېره شپه یوه ماشوم د میمنې ښار د اوومې ناحیې په «بي‌بي ایینه» ګذر کې د موټر لاندې کېدو له امله ژوند له لاسه ورکړی دی.

د فاریاب د ترافیکي پېښو مدیر احمدفهیم کوهي درې واړه پېښې تایید کړې خو ډېر جزییات یې وړاندې نه کړل.