غزني کې درې کسان له جعلي ډالرو سره نیول شوي

غزني‌ښار (پژواک، د لیندۍ لومړۍ نېټه ۱۴۰۳): د غزني امنیه قوماندانۍ وایي چې په دغه ولایت کې درې کسان له څلور زره جعلي ډالرو سره نیول شوي دي.

د غزني امنیې قوماندانۍ ویاند ابوخالد سرحدي پژواک آژانس ته وویل، د لویو لارو ساتونکو نن د مرکز اړوند ناني بازار ته څېرمه درې کسان د یوه کشفي راپور له مخې له څلور زره جعلي امریکايي ډالرو سره نیولي دي.

نوموړي وویل، له یادو کسانو یو میل تومانچه هم ترلاسه شوې او نیول شوي درې واړه کسان د خوست ولايت اصلي اوسېدونکي دي.

سرحدي وايي، هڅې روانې دي چې له دوی سره تړلي نور کسان هم ونیول شي.