کابل ښار کې د نیالګیو اېښودو ژمنی کمپاین پیل شو

کابل (پژواک، ۱۲ لېندۍ ۱۴۰۳): د کابل ښاروالۍ په لومړي ځل د نیالګیو اېښودو ژمنی کمپاین پیل کړ چې په ترڅ کې به یې د ښار په بېلابېلو ساحو کې سل زره نیالګي کېښودل شي.

د نیالګیو اېښودو دغه کمپاین د ښاروالۍ د ښاري زرغونتیا ریاست له لوري نن (د لېندۍ ۱۲مه) د کابل ښار د مرنجان له تپې پیل شو.

د کابل ښاروالۍ د ښاري زرغونتیا رییس مولوي عبدالوکیل متوکل د دغه کمپاین د پیل مراسمو کې وویل، د نیالګیو اېښودو له ژمني کمپاین یې موخه هېوادوالو ته پوهاوی دی، څو پوه شي چې په ژمي کې هم نیالګي اېښودل کېږي او وده کولای شي.

دی وايي، د نیالګیو اېښودو په دغه یو میاشتني (د لېندۍ له ۱۵مې د مرغومي تر ۱۵مې) کمپاین کې به د کابل ښار بېلابېلو ساحو کې شاوخوا سل زره نیالګي کېښودل شي.

هغه زیاتوي: «د کابل ښار له حضوري چمن څخه د بګرامي تر پله، له بنايي څخه تر پل شینه، له عبدالحق څلورلارې تر سرک‌نو  او له هغه ځایه تر تنګي غارو پورې د سړک منځ نیالګیو لپاره د اوبو رسولو سیسټم جوړ شوی چې د اوبو سپما لپاره مهم دی او له دې وروسته به دغو نیالګیو ته ټانکر اوبه نه ورکوي.»

د متوکل په خبره، د ښار په ډېرو سیمو کې نیالګیو ته د اوبو رسولو اساسي سیسټمونه هم جوړوي څو اوبه ضایع نه شي.

د کابل ښاروالۍ د ښاري خدمتونو معین مولوي محمدخالد سجستاني هم د نیالګیو د روزنې او پالنې په اړه خبرې وکړې ویې ویل، په هره سیمه کې د نیالګیو د تربیې لپاره ځانګړي مرکزونه جوړ شوي دي.

دی وايي، کابل ښاروالۍ په تېرو درېیو کلونو کې نیالګي نه دي پېرلي، بلکې په خپله يې روزلي او نهال کړي دي.

د هغه په وینا، کابل ښاروالۍ د ښار د چټلو اوبو لپاره یوه تصفیه‌خون جوړوي او اوبه به له تصفیه کېدو وروسته نیالګیو ته ورکول کېږي.

سجستاني دغه راز وویل، ښاروالۍ د برېښنا له شرکت سره په ګډه پرېکړه کړې چې ټولې فابریکې او کورونه به هم کارول شوې اوبه له تصفیې وروسته نیالګیو ته ورکړي.

هغه له خلکو وغوښتل چې د مېوه لرونکو نیالګیو اېښودو ته هم پاملرنه وکړي، څو کابل ښار له زرغونتيا برخمن شي.

د کابل ښار یو شمېر اوسېدونکو هم د یاد کمپاین پر پیل خوښي ښيي او وايي چې د نیالګیو اېښودو ژمنی کمپاین یو نوی ابتکار دی.

د کابل ښار د اتمې ناحیې یوه اوسېدونکي سيدامام سادات پژواک ته وويل، دغه کار د چاپېریال پاکوالي لپاره یو اغېزناک ګام دی.

هغه زیاته کړه: «دا ډېر ښه کار دی، نیالګي د هوا پاکولو لپاره مهم دي او د دغه کمپاین له برکته به زموږ ښار سرسبز او ښکلی شي.»

د يادې سيمې  بل اوسېدونکي حاجي ملا محمد اخندزاده بيا د نيالګيو پر روزنه او پالنه ټينګار وکړ، ويې ويل چې نيالګي بايد د ماشومانو په څېر وروزل شي او بايد پر وخت اوبه ورکړل شي.

هغه له حکومته وغوښتل چې په راتلونکي کې هم دا ډول کمپاينونه ترسره کړي.