ترکیې څه باندې ۷۰۰ ټنه بشري مرسته افغانستان ته را استولې

کابل (پژواک، ۴ مرغومی ۱۴۰۳): د ترکیې د ترانسپورټ وزارت ویلي، د دغه هېواد د بشردوستانه مرستو یوویشتمه جوپه چې تر اووه سوه ټنه ‌ډېر خوراکي او غیرخوراکي توکي پکې شامل دي، افغانستان ته واستول شوه.

آناټولی خبري اژانس د ترکیې د ټرانسپوټ وزارت له قوله لیکلي، د دغه هېواد د بشري مرستو یوویشتمه جوپه چې ۷۲۳ ټنه خوراکي او غیرخوراکي توکي پکې شامل دي، د «مهربانۍ کاروان» تر عنوان لاندې په ۵۱ کانتینرونو کې افغانستان ته استول شوې.

سرچینه لیکي چې له افغانستان سره د ترکیې په دغه مرسته کې خیمې، کمپلې، د اشپزخانې وسایل، اوړه، جامې او روغتیايي توکي شامل دی.

د ترکیې د ترانسپورټ وزارت زیاته کړې: «ترکیه په سیمه کې د خپلو وروڼو ملاتړ ته دوام ورکوي. د انسانیت په نوم دغه اقدام د ترکیې د سیمه‌ییزي رهبرې رول پیاوړی کوي. مرستې به تل د سولې او یووالي لپاره د امید څراغ وي.»