«اټکل کېږي چې غزه کې به د شاوخوا لسو زرو فلسطینیانو مړي تر خاورو لاندې پاتې وي»

کابل (پژواک، ۲ سلواغه ۱۴۰۳): د الجزیرې د راپور له مخې، د فلسطین ملکي دفاع ادارې اټکل کړی چې غزه کې به د شاوخوا لسو زرو فلسطینیانو مړي لا هم په ویجاړو شوو ودانیو کې تر خاورو لاندې پاتې وي.

د راپورونو له مخې، د اسرائيل او حماس ترمنځ د اوربند او د بندیانو د تبالې تړون تېره اونۍ، د امریکا، مصر او قطر په منځګړیتوب لاسلیک شو. اوربند وړمه ورځ پیل شو او درې تنه اسرائیلیان له ۹۰ تنو فلسطیني بندیانو سره تبادله شول.

د الجزیرې د راپور له مخې، د اوربند په دویمه ورځ لاهم په غزه کې خلک د خپلو خپلوانو د جسدونو په لټه کې دي او سلګونه مړي له ویجاړیو رایستل شوي دي.

په راپور کې د فلسطین د ملکي دفاع ادارې له قوله راغلي، اټکل کېږي چې په ټوله سیمه کې تر ویجاړو شوو ودانیو لاندې لس زره مړي پراته وي.

الجزیرې د فلسطین د بېړنیو خدمتونو ویاند محمود بازال له قوله لیکلي چې لږ تر لږه دوه زره او ۸۴۰ فلسطینیان په بشپړه توګه سوځېدلي او هېڅ نښه نه ده ترې پاتې.

سرچینه زیاتوي چې غزه کې د اسرائیلو په بریدونو کې څه باندې ۴۷ زره فلسطینیانو ژوند له لاسه ورکړی چې ډېری یې ښځې او ماشومان دي او څه باندې ۱۱۱ زره نور ټپيان شوي دي.