کابل (پژواک، ۲۹ وږی ۱۴۰۵): د پاکستان پولیس وایي، وسلهوالو د بر جنوبي وزیرستان د محکمې سرپرست اسفندیار احمد د خیبرپښتونخوا ایالت په ټانک سیمه کې له خپل کوره تښتولی او د هغه د موندلو لپاره عملیات روان دي.
ډان ورځپاڼې د نن ورځې د راپور له مخې، پولیسو ویلي چې وسلهوال د جمعې او شنبې ترمنځ شپې شاوخوا دوې بجې د اسفندیار احمد کور ته ننوتل او هغه یې له ځان سره یووړ.
سرچینه لیکي چې پولیسو له پېښې وروسته د دغه قضايي چارواکي د موندلو او په پېښه کې د ښکېلو کسانو د پېژندلو لپاره پلټنې پیل کړې دي.
بلخوا، جیو نیوز هم د ټانک پولیسو له قوله راپور ورکړی چې شکمن کسان پر دوو موټرسایکلونو سپاره وو او د اسفندیار احمد تر تښتولو وروسته له سیمې وتښتېدل.
تر اوسه کومې ډلې د هغه د تښتولو مسوولیت نه دی منلی.
