<p style="text-align: justify;">کابل (پژواک، ۲۳ سلواغه ۱۴۰۲): د افغانستان د کانونو او پټرولیم وزارت سرپرست د کندهار د «درهنور» سیمې د مرمر ډبرو کان د استخراج، پروسس او اکتشاف تړون له یوه ترکي شرکت سره لاسلیک کړ او دغه شرکت به په دې پروژه کې څه باندې ۶ میلیون او ۲۰۰ زره امریکايي ډالر پانګونه وکړي.</p>
<p style="text-align: justify;">دغه تړون د افغانستان د کانونو او پټرولیم وزارت سرپرست ملا هدایتالله نن (سهشنبه، د سلواغې ۲۳مه) د «امي اغلو شرکت» په نوم د یوه ترکي شرکت له مرسیتال موسی امي اوغلو سره لاسلیک کړ.</p>
<p style="text-align: justify;">بدري وویل: «نن د مرمر ډبرو د یوه ستر کان قرارداد چې د کندهار ولایت د شاهولي کوټ ولسوالۍ په دره نور سیمه کې دی، د امي اغلو په نوم له یوه ترکي شرکت سره لاسلیک شو، دغه شرکت د یاد کان د استخراج، پروسس او اکتشاف په برخه کې ۶ میلیون او ۲۰۰ زره امریکايي ډالر پانګونه کوي.»</p>
<p style="text-align: justify;">هغه وویل چې د دغه کان د کیندلو له پیلېدو سره به سلګونه کسانو ته د کار زمینه برابره شي او زیاته کړه، یاد شرکت به له ژمنې سره سم په نړۍوالو معیارونو برابر استخراج، پروسس او اکتشاف کوي.</p>
<p style="text-align: justify;">دغه راز هغه وویل چې یاد ترکي شرکت به د کان شاوخوا ځايي خلکو ته د روغتايي او زدهکړو مرکزونو جوړولو برخه کې هم کار کوي.</p>
<p style="text-align: justify;">د «امي اغلو شرکت» مرستیال موسی امي اغلو وویل چې دغه شرکت د مرمر ډبرو، نفتو او ګازو د استخراج او پروسس برخو کې فعالیت کوي.</p>
<p style="text-align: justify;">هغه زیاته کړه: «موږ هڅه کوو چې د افغانستان مرمر ډبرې له تولید او پروسس وروسته په نړۍواله کچه معرفي کړو څو ځانګړي پیرېدونکي ولري او دغه کار د دواړو هېوادونو د خلکو او حکومتونو په ګټه دی.»</p>
<p style="text-align: justify;">د افغانستان د کانونو او پټرولیم وزارت په خبرپاڼه کې راغلي چې دغه تړون د ۳۰ کلونو لپاره له یاد ترکي سرکت سره لاسلیک شوی دی.</p>
<p style="text-align: justify;">د مرمر ډبرو دغه درې کیلومتر مربع کان د کندهار ولایت د شاوليکوټ ولسوالۍ په درهنور سیمه کې موقعیت لري او د هېواد د مرمر ډبرو له مهمو کانونو شمېرل کېږي.</p>
