جلالاباد (پژواک، ۲۵ کب ۱۴۰۳): د ننګرهار ولایت د ښاروالۍ او کرنې ریاستونو له لوري د څه باندې ۱۱ میلیونه افغانیو په لګښت د بیارغونې د دوو پروژو چارې پیل شوې.
د جلالاباد ښاروالۍ ویاند حامد محمودي پژواک خبري اژانس ته وویل، ښاروالۍ د روان مالي کال د انکشافي پروژو په لړ کې د پنځمې او اوومې ناحیو ترمنځ د سېلابونو له امله تخریب شوی واش د ۷.۵ میلیونه افغانیو په لګښت د کانکرېټ چارې پیل شوې.
د هغه په وینا، دغه واش ۸۰ متره اوږدوالی او اته متره سور لري چې د ښاروالۍ له داخلي عوایدو به په اساسي او معیاري ډول ورغول شي.
د یو بل خبر له مخې، د ننګرهار کرنې، اوبو لګولو او مالدارۍ رياست تر چتر لاندې د «يواېنډيپي» په ۳.۶ ميليونه افغانيو مالي ارزښت په بهسودو او کامې ولسواليو کې کرنيزو ځمکو ته د اوبو رسولو په موخه د اتو شبکو د جوړولو چارې پيل شوې.
د کرنې رییس مولوي محمدولي محسن وايي چې هره شبکه د ۳۵ زره لېتره اوبو ظرفيت لري چې د لمريزې برېښنا پرمټ به دوه سوه جريبه هغو ځمکو ته اوبه ورسوي چې د کانال له سطحې په لوړه ارتفاع کې پرتې دي.
نوموړی وايي، په دې پروژه کې د يادو ولسواليو ۱۵۰ اوسېدونکو ته د کار زمينه برابره شوې چې په بشپړېدو سره به يې د اوبو مديريت، د بزګرانو اقتصادي پياوړتيا او د خوړو خونديتوب رامنځته شي.
GET IN TOUCH
NEWSLETTER
SUGGEST A STORY
PAJHWOK MOBILE APP