کابل (پژواک، ۲۸ کب ۱۴۰۳): په افغانستان کې د یوه بل کال لپاره د یوناما د فعالیت له غځېدو سره هممهاله، د اسلامي امارت ویاند وايي چې دغه بنسټ باید د افغانستان، ملګرو ملتونو سازمان او نورو هېوادونو ترمنځ د اړیکو پیاوړتیا لپاره هڅه وکړي.
د ملګرو ملتونو امنیت شورا پرون (دوشنبه) په افغانستان کې د ملګرو ملتونو د مرستندویه پلاوي دفتر (یوناما) ماموریت د رایو په اتفاق د یوه بل کال لپاره وغځاوه.
د اسلامي امارت ویاند ذبیحالله مجاهد نن (سهشنبه) پر اېکسپاڼه د یوه پیغام په خپرولو ویلي چې یوناما باید افغانستان کې امنیتي، اقتصادي او ټولنیز پرمختګونه په سم ډول منعکس کړي.
هغه زیاته کړې: «له یوناما غواړو چې له دې استازولي باید د افغانستان، ملګرو ملتونو سازمان او نورو هېوادونو ترمنځ د اړیکو د پیاوړتیا په موخه هڅه وکړي، افغانستان کې امنیتي، اقتصادي او ټولنیز پرمختګونو په سم ډول انعکاس کړي.»
هغه څرګنده کړې چې یوناما باید د بېځایه بندیزونو لرې کولو، د افغانانو پر شتمنیو د بندیزونو پای ته رسولو، په ملګرو ملتونو کې د افغانستان څوکۍ اسلامي امارت ته د سپارلو او داسې نور د افغانانو حقونو په ترلاسه کولو کې هڅه وکړي.
مجاهد زیاته کړې: «دغه راز دوی باید د تېر په څېر بېځایه اندېښنې راپورته نه کړي، له یوې یا دوو موضوعاتو په استفادې د افغانستان پر وړاندې پروپاګند ونه کړي او د مغرضو کړیو د لاس اله ونه ګرځي.»
د یادولو ده چې په افغانستان کې د یوناما ماموریت د راتلونکي ۲۰۲۶ کال د مارچ تر ۱۷مې غځول شوی دی.
GET IN TOUCH
NEWSLETTER
SUGGEST A STORY
PAJHWOK MOBILE APP