منصور: د موسسو له خوا د راوړل شوو مرستو ۸۰ سلنه یې د هغوی پر خپلو لګښتونو مصرفېږي

ګردېز (پژواک، ۱۳ وری ۱۴۰۴): د اوبو او انرژي وزارت سرپرست وایي، امریکا تر اوسه اسلامي امارت سره يو ډالر هم مرسته نه‌ده کړې، او هغه ادعاوې چې ګواکې واشنګټن د پخواني حکومت په څېر اوسني حکومت ته هم پیسې لېږي، یوازې تبلیغات دي.

د اوبو او انرژي وزارت سرپرست عبدالطيف منصور دغه څرګندونې یې تېره ورځ د پکتیا ولایت زرمت ولسوالۍ کې د نښې ویشتلو سیالیو د پای مراسمو کې کړې دي.

هغه وایي چې امريکا تر اوسه يو ډالر هم اسلامي امارت ته د مرستې په توګه ندی ورکړی او دا فقط د اوسني نظام پر وړاندې د دښمن تبليغات دي او کومې پيسې چې افغانستان ته راځي دا د مؤسساتو مرستې دي.

هغه زیاته کړې: «زموږ د دې نظام دښمنان داسې اعلان هم کوي چې څرنګه چې جمهوريت په وخت کې د ډالرو کڅوړې را رارونې وې، اوسني حکومت ته هم را روانې دي، دا يوازې هغه ډالر و چې هغه اينجوګانو او مؤسساتو ته راتلې خو طالبانو فقط دومره ابتکار وکړ چې دا مرستې منظمې شوې،امريکا داسې ماته شوې چې په ټوله نړی کې شرميدلې آيا هغه به بيا مرستې رالېږي؟»

هغه دغه راز وويل چې افغانستان ته د مؤسساتو له خوا راوړونکې پيسې يې اتيا سلنه بېرته د هغوی په تنخوا او نورو لګښتونو مصرفېږي، يوازې په شل سلنه پيسو باندې که چېرته وياله او پلچک جوړ شوی وي.

د ده په خبره: «دې ملت ته چې د موسساتو کومې پيسې راځي اتيا فيصده يې د دغو اينجوګانو او مؤسساتو تنخوا او مصارف دي، دا شل سلنه يوازې په يوه وياله او پلچک مصرف کړي او عکس ورسره واخلي چې موږ کار وکړ.»

د اوبو او انرژي وزارت سرپرست همداشان مسوولينو ته په خطاب کې وويل چې د ملت پر مټ اقتدار ته رسيدلي، نو د خلکو او ولس شرعي حقونه او ستونزې بايد په پراخه سينه واوريدل شي او هغه حل کړل شي.

هغه زیاته کړه چې د اسلامي امارت هره پاليسي او پرېکړه له دين او عنعناتو سره موافقه ده او له خلکو يې غوښتنه وکړه چې اوسني نظام ملاتړ دې وکړي.