پلعلم (پژواک، ۲۴ وری ۱۴۰۴): د لوګر د صنعت او سوداګرۍ ریاست مسوولین وايي چې د دغه ولایت له بازارونو راټول شوي اته ټنه بېکیفیته او تاریختېر خوراکي او غیرخوراکي توکي وسوځول شول.
د دغه ولایت د صنعت او سوداګرۍ رییس مولوي شبیراحمد صدیقي پژواک خبري اژانس ته وویل: «د صنعتي پارکونو، سوداګریزو چارو امریت او د مستهلکینو ملاتړ کمېسيون له لوري په تېرو درېیو میاشتو کې هغه اته تڼه تاریختېر او بېکیفیته خوراکي او غیرخوراکي توکي چې د لوګر ولایت له بېلابېلو اصنافو راټول شوي وو، د یاد کمېسیون او محکمې د پرېکړې پر اساس له منځه یووړل شول.»
د نوموړي په خبره، دوی هڅه کوي څو د دغه ولایت له بازارونو تاریختېر او بېکیفیته خوراکي او غیرخوراکي توکې په دوامداره ډول راټول او له منځه یوسي.
بلخوا، د مرکز پلعلم یوه اوسېدونکي امینالله پژواک ته وویل، د لوګر مسوولو ادارو ته په کار ده چې هره میاشت د خوراکي او غیرخوراکي توکو د هټیو ترڅنګ د درملتونونو څارنه هم وکړي او هیچا ته د دې اجازه ورنه کړي چې پر خلکو بېکیفیته او تاریختېر خوراکي او غیرخوراکي توکي وپلوري.
د یادولو ده، دوه اونۍ مخکې هم د لوګر د امر بالمعروف ریاست له لوري درې ټنه تاریختېر او بېکیفیته خوراکي او غیرخوراکي توکي له منځه وړل شوي وو.
GET IN TOUCH
NEWSLETTER
SUGGEST A STORY
PAJHWOK MOBILE APP