مزارشریف ښار کې د یوې څلورلارې جوړولو چارې پیل شوې

مزارشریف (پژواک، ۲۷ وری ۱۴۰۴): د بلخ په مرکز مزارشریف ښار کې د یوه خصوصي شرکت له لوري د لس میلیونه افغانیو په ارزښت د «نوي ښار» په نوم د یوې څلورلارې د جوړېدو چارې پیل شوې.

د بلخ ولایت په مرکز مزارشریف ښار کې د کابل – بلخ پر لویه لار د بلخ د هوايي ډګر او نوي ښار ښارګوټي ترمنځ سیمه کې د یوه خصوصي شرکت له لوري د نوي ښار په نوم د یوې څلورلارې د جوړېدو چارې پیل شوې چې لس میلیونه افغانۍ لګښت ورباندې کېږي او چارې به یې د درېیو میاشتو په موده کې بشپړې شي.

د مزارشریف ښاروال عبدالرحمن همت نن په همدې موخه جوړه شوې غونډه کې له نورو سوداګرو هم وغوښتل چې په کور دننه د پانګونې سربېره دې د ښار په ښکلا او زرغونتیا کې هم له حکومت سره په ګډه کار وکړي.

هغه دغه راز وویل، دا مهال په مزارشریف ښار کې ۱۸ څلورلارې شته چې هڅه کوي په راتلونکي کې ټولې له سره ورغوي.

ورته مهال، د یادې سیمې اوسېدونکي هم خوښ دي چې له دې سره به د مزارشریف ښار ښکلا لا ډېره او د موټرو ګڼه‌ګوڼه به کمه شي.