عراقچی: ایران نورو هېوادونو یا سیمې ته د جګړې پراخېدو غوښتونکی نه دی

کابل (پژواک، ۲۵ غبرګولی ۱۴۰۴): د ایران د بهرنیو چارو وزیر وايي، تهران هیڅکله نه غواړي جګړه نورو هېوادونو یا سیمې ته پراخه شي خو دا چې جګړه پر ایران تحمیل شي.

د ایرنا خبري اژانس د راپور له مخې، د ایران د بهرنیو چارو وزیر سیدعباس عراقچي نن (یکشنبه) په دغه هېواد کې د بهرنیو استازولیو له رییسانو او سفیرانو سره په ناسته کې ویلي چې اسرائیل د مذاکراتو او ډیپلوماسۍ مخالف دی.

هغه څرګنده کړې: «موږ په هيڅ صورت نورو هېوادونو یا سیمې ته د جګړې پراخېدو غوښتونکي نه یو، خو دا چې که جګړه پر موږ تحمیل شي. اصولاً موږ د جګړې پیلوونکي نه وو، د خپل اټومي پروګرام په اړه د ډیپلوماسۍ په لټه کې وو خو دا تجاوز پر موږ تحمیل شو.»

نوموړي څرګنده کړه، اسرائیل د نړۍوالو حقونو له نوې سرې کرښې تېر شوی چې هغه د ایران پر اټومي تأسیساتو برید و چې دا د ملګرو ملتونو له نظره یوه لویه سرغړونه ده او تر هر ډول شرایطو لاندې ممنوع ده.

هغه امریکا د «صهیونیستي رژیم» د بریدونو شریکه بللې او څرګنده کړې یې ده چې واشنګټن باید خپل مسوولیت ومني.

عراقچي ویلي: «پر ایران د اسرائیل تېری د امریکا له ملاتړ او توافق پرته امکان نه درلود؛ موږ معتبر اسناد لرو چې د امریکايي ځواکونو او امریکايي نظامي اډو د ملاتړ ښودونکي دي.»

ورته مهال، د ایران د بهرنیو چارو وزیر له امریکا غوښتي څو پر اټومي تاسیساتو برید وغندي.

د یادونې ده، د راپورونو له مخې، د اسرائیل او ایران ترمنځ تاوتریخوالی نوي پړاو ته داخل شوی او د دواړو خواوو له لوري تېره شپه هم توغندیز او هوايي بریدونو دوام درلود چې ډېر تلفات او درانه زیانونه یې اړولي دي.