کابل (پژواک، ۵ چنګاښ ۱۴۰۴): د راپورونو له مخې، مسکو کې یوه بلاروسي وګړي یو افغان ماشوم په ډېر شدت په ځمکه وهلی چې له امله یې ماشوم ته جدي زیان رسېدلی، بریدګر وروسته له دې کړنې پولیسو نیولی او د وژلو لپاره پر هڅه یې اعتراف کړی دی.
د چارو پوهان پر کوچني ماشوم دغه برید یوه فاجعه او جنایت بولي، د بریدګر لپاره د سختې سزا غوښتنه کوي او ټینګار کوي چې د ماشوم او د هغه د کورنۍ رواني او روغتیایي زیانونه باید جبران شي.
د راپورونو له مخې، د ولادیمیر ویتکوف په نوم یوه ۳۱ کلن بلاروسي وګړي پرون (چهارشنبه، د چنګاښ ۴مه) د یزدان په نوم پر یوه افغان ماشوم د مسکو په شرمتیو هوايي ډګر کې برید کړی دی.
د امنیتي کامرو ویډیویي انځورونه ښیي چې ویتکوف ماشوم راپورته کوي او په ډېر شدت یې پر ځمکه وهي.
د برېتانیا ډیليمېل ورځپاڼې لیکلي: «یاد بریدګر چې د یوه روسي مقام له لوري ورته د «هیولا» لقب ورکړل شو، لومړی شاخوا ګوري چې څوک ورته ګوري که نه، بیا ناڅاپه ماشوم رانیسي او په شدت یې د شرمتیو هوايي ډګر ورودي سالون کې پر ځمکه وهي.»
دغه راز د برېتانیا ډیليمیرر ورځپاڼې د راپور له مخې، یاد ماشوم له خپلې کورنۍ سره د ایران او اسرائیل ترمنځ د ۱۲ ورځنۍ جګړې له امله له ایرانه له تېښتې وروسته روسیې ته تللی و.
ورځپاڼه کاږي: «د ۱۸ میاشتنی یزدان د سر کوپړۍ شدیده ماته شوې، د ملا مهرو یې سخت زیان لیدلی او د ژوندي پاتې کېدو لپاره مبارزه کوي.» دغهراز، ویل شوي چې ویتکوف هم په هماغې الوتکه کې سپور و چې دغه ماشوم او مور یې پهکې سپاره وو.»
ډیلي میرر او ډیليمېل دواړو راپور ورکړی چې د یاد ماشوم کوپړۍ او د ملا مرۍ ماتې شوې او ډیليمېل تېره شپه لیکلي چې ماشوم د کوما په حالت کې دی.
د راپورونو له مخې، ویتکوف له قبرس یا مصر څخه مسکو ته الوتنه کړې وه، له پېښې وروسته نیول شوی او د پوښتنو پر مهال یې ویلي: «هڅه مې وکړه چې ماشوم ووژنم.»
راپورونه ښيي چې پولیس د نژادپالنې انګېزې په ګډون احتمالي انګېزې څېړي.
په مسکو کې د ماشومانو د حقونو مسوول کسنیا میشنووا ویلي: «د دننه کېدو په سالون کې پر نشهيي توکو اخته یو هیولا یو ۱۸ میاشتنی ماشوم راپورته کوي او په خپل ټول زور یې پر ځمکه وهي؛ دغه پېښه واقعاً د زغملو نه ده، هیلهمنه یم دغه هیولا د قانون له ټول شدت سره مخ شي. د ماشوم لپاره د ژر ښه کېدو هیله لرم او له خدای (ج) غواړم چې والدینو ته یې د دې فاجعې د زغملو توان ورکړي.»
د سیاسي چارو پوه روحالله هوتک یاده پېښه یو دردوونکی ناورین او بشري جنایت بللی او زیاتوي چې د نړۍوالو قوانینو، په ځانګړې توګه بشري قوانینو پر اساس د یوه ماشوم پر وړاندې دغه ډول عمل یو لوی جنایت او تاوتریخوالی شمېرل کېږي.
هغه زیاتوي، د روسیې د قوانینو له مخې، د وژلو هڅه او سخت فزیکي زیان اړول جرم ګڼل کېږي او عامل ته یې باید قاطع او څرګنده سزا ورکړل شي.
هوتک وايي: «زموږ وړاندیز او غوښتنه دا ده چې د نړۍوالو قوانینو او اسلامي اصولو له مخې، د یاد جرم ترسرهکوونکی باید د خپل کار له امله سخت مجازات شي، د ماشوم او کورنۍ روغتیايي او رواني زیانونه یې جبران شي او د ورته پېښو له تکراره د مخنیوي لپاره دې امنیتي تدابیر ډېر شي.»
د سياسي چارو شنونکي امانالله هوتکي هم دغه پېښه یوه ډېره دردونکې او خواشينونکې پېښه وبلله او ویې ویل چې دا ډول کړنې هم له انسانیت او هم له بشریت څخه لرې دی.
دی وايي: «دا هغه څه دی چې هېڅوک به یې ونه کړي، نه یې مسلمان د یهودو په مقابل کې کوي او نه یې یهود د مسلمان په مقابل کې کوي، له هرې نګاه چې ورته ګورې، دا ډېره بده پېښه شوې او بېخي د لیدلو وړ نه ده.»
هغه د روسيې پر حکومت او نړۍوالو سازمانونو - چې په دې برخه کې کار کوي - غږ وکړ چې پر ماشوم بریدکوونکی محاکمه کړي او سخته سزا ورکړي، څو په ټوله نړۍ کې ماشومان له داسې ورته پېښو خوندي پاتې شي او د نورو لپاره د عبرت درس شي.
GET IN TOUCH
NEWSLETTER
SUGGEST A STORY
PAJHWOK MOBILE APP