کابل (پژواک، ۵ چنګاښ ۱۴۰۴): د ایران او اسرائیل ترمنځ له جګړې وروسته افغانستان ته له ایرانه د کډوالو راستنېدل ډېر شوي، د کډوالو په چارو کې د ملګرو ملتونو عالي کمېشنرۍ دغو راستنېدونکو ته د بېړنیو مرستو غوښتنه کړې او ویلي یې دي چې هغوی ته دې د ملاتړ اوږدمهاله پروګرامونه جوړ شي.
د یادونې ده، د ایران او اسرائیلو ترمنځ دوولس ورځنۍ جګړه چې د غبرګولي په ۲۳مه پیل شوې وه او د روانې چنګاښ میاشتې تر درېیمې نېټې یې دوام درلود، د امریکا د ولسمشر ډونالډ ټرمپ له لوري د اوربند له اعلان سره پای ته ورسېده.
نن (پنجشنبه) د کډوالو په چارو کې د ملګرو ملتونو د عالي کمېشنرۍ دفتر (یوناېچسيار) پر خپله فېسبوکپاڼه یوه ویډیو خپره کړې چې د دې ادارې استازی عرفات جمال پهکې خبرې کوي او ویلي یې دي: «زه د افغانستان او ایران ترمنځ له پولې خبرې کوم، شا ته مې د خلکو یوه لویه ډله ده چې د جګړو له امله یې ایران پرېیښی دی.»
هغه وايي، دا هغه افغانان دي چې د تېرو څلوېښتو کلونو جګړو له امله یې افغانستان پرېیښی و او ایران ته کډوال شوي وو خو په دې وروستیو کې یې په ایران کې د جګړې او ناامنۍ له امله خپل هر څه پرېیښي او بېرته خپل هېواد ته ستانه شوي دي.
نوموړي له نړۍوالې ټولنې غوښتي: «له موږ سره مرسته وکړئ څو له هغو کډوالو مرسته وکړو چې له ایرانه راستانه شوي، موږ بېړني ځواب ته اړتیا لرو خو ورته مهال د اوږدمهاله مرستو په اړه هم فکر وکړئ، ایا موږ غواړو دا سیمه لا هم بېثباته پاتې شي؟ وروسته له ډېر وخته د وسلې کارول بند شوي، د بمونو غورځول پای ته رسېدلي خو ښايي وضعیت لا هم نازک وي، له موږ سره مرسته وکړئ څو له دغو خلکو سره مرسته وکړای شو او داسې شرایط برابر کړو څو هغوی وکولای شي خپل ژوند له هماغه ځایه چې چېرته وو، بېرته ورغوي.»
د پژواک د یوه خبر له مخې، پرون (د چنګاښ ۴مه) له ایرانه څه باندې ۳۰ زره افغان کډوال د اسلامکلا بندر له لارې هېواد ته راستانه شوي دي.
د یادونې ده، له دې مخکې د هرات په اسلامکلا بندر کې چارواکو ویلي وو چې هره ورځ څه باندې لس زره افغان کډوال له ایرانه هېواد ته راستنېږي چې له دې ډلې ۷۰ سلنه یې په داوطلبانه ډول راځي او پاتې ۳۰ سلنه په زور را ایستل کېږي.
GET IN TOUCH
NEWSLETTER
SUGGEST A STORY
PAJHWOK MOBILE APP