ننګرهار کې پنځه مخابراتي شبکې ګټې اخیستنې ته وسپارل شوې

کابل (پژواک، د زمري لومړۍ نېټه ۱۴۰۴): د مخابراتو او معلوماتي ټکنالوجۍ وزارت وايي چې د ننګرهار ولایت په پنځو ولسوالیو کې پنځه مخابراتي شبکې جوړې او ګټې اخیستنې ته وسپارل شوې.

د یاد وزارت په خبرپاڼه کې راغلي چې دغه شبکې د ننګرهار ولایت په غني‌خېلو، کوټ، هسکې‌مینې، رودات او چپرهار ولسوالیو کې د افغان ټلېکام «سلام» مخابراتي شرکت له لوري جوړې شوې دي.

سرچینه زیاتوي، چې د یادو ولسوالیو اوسېدونکي پخوا دغو خدمتونو ته پوره لاسرسی نه درلود، خو د نویو شبکو له فعالېدو سره به یې دا ستونزې هوارې شي.