خوست ښار کې د ۲۷ میلیون افغانيو په لګښت د یوې رغنیزې پروژې چارې پیل شو

خوست‌ښار (پژواک، ۹ زمری ۱۴۰۴):سیمه‌ییز مسوولین وایي، خوست ښار کې د نږدې ۲۷ ميليون افغانيو په لګښت د یوې رغنیزې پروژې چارې پيل شوې.

مسوولين زیاتوي، په دې پروژه کې چې د ښار په لومړۍ، درېيمه او څلورمه ناحيو کې پلې کېږي، د ۱۷۷۰ متره سړک، ۷۰۰ متره ویالو او دوو پلچکونو جوړول شامل دي.

د خوست ښاروال مفتي شهزاد نور راشد د دې پروژې د چارو پيل پر مهال وويل چې د دې پروژې چارې په راتلونکو پنځو مياشتو کې بشپړې شي، ورسره به د ښاريانو د تګ راتګ پر مهال ډېرې ستونزې حل شي.

هغه زیاته کړه، روان کال به په خوست ښار کې د ۳۸۰ ميليون افغانيو په لګښت رغنیزې پروژې پلې شي.

بلخوا، د خوست اوسېدونکي په ښار کې د منظم ترافيکي سيسټم او د نورو ښاري اسانتياوو په موخه د ورته پروژو پر پلې کېدو ټينګار کوي.

د خوست يوه اوسېدونکي عنايت‌الله پژواک ته وويل که دا د سړکونو او لښتيو پروژه په معياري ډول سرته ورسېږي، ورسره به په ښار کې د بې‌ځايه ګڼې‌ګوڼې مخه ونيول شي.

د ښار يوه بل اوسېدونکي له ښاروالۍ غوښتنه وکړه چې د پروژو پلې کېدو برخه کې دې کيفيت ته ځانګړی پام وکړي او نيمګړتياوې يې دې له منځه يوسي.

د ښاروالۍ د مسوولينو د معلوماتو له مخې، تېر کال هم په خوست ښار کې د شاوخوا ۴۰۰ ميليون افغانيو په لګښت ۳۲ بېلابېلې پروژې پلې شوې دي.